Մոսկվայի պետական լեզվաբանական համալսարանում բացվել է «Հայագիտությունը լեզվի և մշակույթի համատեքստում» խորագրով գիտաժողովը

02 մարտի, 2022

Ս/թ․ մարտի 1-ին Մոսկվայի պետական լեզվաբանական համալսարանում (МГЛУ) մեկնարկել է «Հայագիտությունը լեզվի և մշակույթի համատեքստում» խորագրով երկօրյա միջազգային գիտաժողովը՝ նվիրված բուհի ԱՊՀ անդամ-պետությունների լեզվի և մշակույթի բազային կազմակերպության ու Հայոց լեզվի և մշակույթի կենտրոնի 20-ամյակին։

Գիտաժողովի բացմանը ՌԴ-ում ՀՀ դեսպանության դեսպանորդ Արսեն Առաքելյանն ընթերցել է ՀՀ ԿԳՄՍ նախարար Վ․Դումանյանի ուղերձը՝ հասցեագրված համալսարանի ռեկտոր Ի․Կրաևային, գիտաժողովի կազմակերպիչներին և մասնակիցներին։

Դեսպանության անունից ողջունելով գիտաժողովի կազմակերպիչներին և մասնակիցներին՝ Ա․Առաքելյանն ընդգծել է դեսպանության պատրաստակամությունը շարունակել ՄՊԼՀ-ի, Հայոց լեզվի և մշակույթի կենտրոնի և այլ ուսումնական հաստատությունների հետ համագործակցությունը՝ հայագիտության ոլորտի ուսումնասիրությունների ընդլայնման և հայոց լեզվի հանրահռչակման նպատակով։

Միջոցառման շրջանակներում Հայոց լեզվի և մշակույթի կենտրոնի ղեկավար Արմինե Մարտիրոսյանին հանձնվել է ՀՀ ԿԳՄՍ շնորհակալագիրը՝ կենտրոնի 20-ամյակի առթիվ և հայ մշակույթի հանրահռչակման գործում ներդրած մեծ ավանդի համար։

Միջոցառմանը ելույթներով հանդես են եկել «Ռուսաստանում հայերի միության» նախագահ Արա Աբրահամյանը, բուհի ԱՊՀ անդամ-պետությունների լեզվի և մշակույթի բազային կազմակերպության ղեկավար Վլադիմիր Կոնևը, Հայոց լեզվի և մշակույթի կենտրոնի ղեկավար Արմինե Մարտիրոսյանն ու այլք։

Գիտաժողովի առաջին նիստի շրջանակներում ելույթներով հանդես են եկել ՀՀ ԿԳՄՍ սփյուռքի բաժնի գլխավոր մասնագետ Թամարա Զալինյանը, ռուսաստանյան և հայաստանյան բուհերի ներկայացուցիչներ, ինչպես նաև առցանց ձևաչափով՝ եվրոպական ուս․հաստատությունների հայագետներ։

Գիտաժողովը կազմակերպվել է ՌԴ-ում ՀՀ դեսպանության և ՌՀՄ-ի աջակցությամբ։

Հայագիտությանն առնչվող արդի հարցերի քննարկումը շարունակվել է մարտի 2-ին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր