«Հայաստան-Ռուսաստան․մշակույթների երկխոսություն»․ Սոչիում կայացել է «Հայաստանի օրերը Կրասնոդարի երկրամասում» ծրագրի գալա համերգը

03 ապրիլի, 2023

Ապրիլի 2-ին «Հայաստանի օրերը Ռուսաստանի մարզերում» ծրագրի շրջանակներում ք․ Սոչիի Ձմեռային թատրոնում տեղի է ունեցել «Հայաստան-Ռուսաստան․մշակույթների երկխոսություն» խորագիրը կրող գալա համերգը։

Միջոցառմանը ողջույնի ելույթներով հանդես են եկել ՌԴ-ում ՀՀ դեսպան Վաղարշակ Հարությունյանը և ք․Սոչիի վարչակազմի ղեկավարի տեղակալ Ելենա Կոնյուկը։

Իր խոսքում ՌԴ-ում ՀՀ դեսպանը նշել է, որ Կրասնոդարի երկրամասում Հայաստանի օրերի անցկացումը կարևոր նախաձեռնություն է՝ ուղղված երկու երկրների ժողովուրդների միջև պատմական և հոգևոր-մշակութային կապերի ամրապնդմանը։ Վ․Հարությունյանն ընդգծել է, որ Հայաստանի և Ռուսաստանի ժողովուրդներին միավորում են բարեկամական սերտ հարաբերությունները, բազմադարյա պատմական և մշակութային ժառանգությունն ու ընդհանուր հաղթանակները։

ՌԴ-ում ՀՀ դեսպանն անդրադարձել է նաև հայ-ռուսական դաշնակցային փոխգործակցությանը՝ ընդգծելով դրա առանցքային նշանակությունը ժամանակակից պայմաններում։

Իր հերթին ք․Սոչիի վարչակազմի ղեկավարի տեղակալ Ելենա Կոնյուկը վստահություն է հայտնել, որ մեկնարկած ծրագիրը կնպաստի Սոչիի և Հայաստանի քաղաքների միջև մշակութային և հումանիտար համագործակցության զարգացմանը։

Երեկոն շարունակվել է Ռուսաստանի պետական ակադեմիական Մարիինյան թատրոնի, Ս․Փարաջանովի անվ․ մոսկովյան թատրոնի, Ա․Բաբաջանյանի հիշատակի միջազգային հիմնադրամի մենակատարների և «Արարատ Բենդ» ազգային երաժշտական գործիքների համույթի կատարումներով։

Միջոցառման շրջանակներում ՌԴ-ում դեսպանության շնորհակալագրերն են հանձնվել ք․Սոչիի վարչակազմի ղեկավարի տեղակալ Ելենա Կոնյուկին և Սոչիի հայ համայնքի ղեկավար Իլարիոն Վարվաշտյանին։

Նշենք, որ «Հայաստանի օրերը Ռուսաստանի մարզերում» ծրագրի կազմակերպիչներն են ՌԴ-ում ՀՀ դեսպանությունը, դեսպանությանը կից գործող Մշակույթի կենտրոնը՝ ք․Սոչիի վարչակազմի և տեղի հայ համայնքի աջակցությամբ։ Ծրագրի ղեկավար՝ Վլադիմիր Գաբբե։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր