Պաշտոնական ընդունելություն՝ նվիրված ՀՀ անկախության 21-րդ տարեդարձին

24 սեպտեմբերի, 2012

Սեպտեմբերի 21-ին Մոսկվայի «Ռենասանս Մոնարխ» հյուրանոցային համալիրի շքասրահում տեղի է ունեցել Հայաստանի Հանրապետության Անկախության 21-րդ տարեդարձին նվիրված պաշտոնական ընդունելությունը, որին մասնակցել են Ռուսաստանի Դաշնության բարձրաստիճան պաշտոնյաներ, ՌԴ-ում հավատարմագրված օտարերկրյա դիվանագիտական առաքելությունների ներկայացուցիչներ, ռուսաստանյան քաղաքական, հասարակական ու մշակույթի ոլորտի հայնտի գործիչներ եւ հայ համայնքի անվանի ներկայացուցիչներ:

Պաշտոնական հանդիսությանը բացման խոսքով հանդես է եկել ՌԴ-ում ՀՀ Արտակարգ եւ լիազոր դեսպան Օլեգ Եսայանը՝ նշելով երիտասարդ պետության դերը միջազգային ասպարեզում եւ երախտիքի խոսք հայտնելով բոլոր բարեկամ պետություններին:

Ընդգծելով Հայաստանի եւ Ռուսաստանի միջեւ պատմական բարեկամության եւ համագործակցության կարեւորությունը միջեպետական հարաբերությունների նորագույն պատմության մեջ՝ Դեսպան Օ.Եսայանն նշել է, որ դրանց զարգացման կարեւորագույն պայման են հանդիսանում Հայաստանի Հանրապետության եւ Ռուսաստանի Դաշնության միջեւ դիվանագիտական հարաբերությունների հաստատումը, որի 20 տարին նշվում է 2012թ.-ին, եւ 1997թ. օգոստոսի 29-ին ստորագրված «Բարեկամության, համագործակցության ու փոխադարձ օգնության մասին պայմանագիրը», որի 15 տարին նշվում է այս օրերին:

Իր հերթին ՌԴ Արտաքին գործերի նախարարի տեղակալ Իգոր Մարգուլովը ողջունել է ողջ հայ ժողովրդին եւ, թվարկելով հայ-ռուսական հարաբերությունների նվաճումները, ներկայացրել է երկու պետությունների միջեւ առեւտրատնտեսական համագործակցությանը վերաբերող մի շարք թվեր: Նա կարեւորել է նաեւ հայ-ռուսական ռազմավարական համագործակցությունը տարածաշրջանային եւ միջազգային մակարդակներում:
Պաշտոնական ընդունելությունը շարունակվել է համերգային ծրագրով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր