Ծաղկեպսակների եւ ծաղիկների մատուցման արարողություն Մոսկվայում՝ նվիրված 1988թ.-ի «Սումգայիթյան ջարդերի» զոհերի հիշատակին

28 փետրվարի, 2013

Փետրվարի 28-ին Մոսկվայի Սուրբ Հարություն եկեղեցու տարածքում տեղադրված խաչքարի մոտ տեղի է ունեցել 1988թ.-ի փետրվարի 27-ից 29-ը «Սումգայիթյան ջարդերին» զոհ դարձած հայերի հիշատակին նվիրված ծաղկեպսակների եւ ծաղիկների մատուցման արարողությունը, որին մասնակցել են ՌԴ-ում ՀՀ դեսպան Օլեգ Եսայան, ՀԱՊԿ-ում ՀՀ լիազոր ներկայացուցիչ Արա Բադալյանը, ԼՂՀ ներկայացուցիչ Ալբերտ Անդրյանը, դեսպանության դիվանագետները, հայ համայնքային կառույցների ղեկավարները եւ մոսկովյան բուհերի հայ ուսանողեր:

Ներկաներին ուղղված խոսքով հանդես է եկել ՌԴ-ում ՀՀ դեսպանը Օլեգ Եսայանը՝ ընդգծելով, որ 25 տարի առաջ ադրբեջանական իշխանությունների սանձահարմամբ տեղի է ունեցել հայ ժողովրդի նորագույն պատմության ամենամեծ ողբերգություններից մեկը: «Այս օրերին Ռուսաստանում կազմակերպված տարաբնույթ միջոցառումները, հուշերեկոները կոչված են վերստին հարգանքի տուրք մատուցելու Սումգայիթում անմեղ զոհված հայերի հիշատակին եւ դատապարտելու 1988թ.-ի սարսափելի իրադարձությունները: Համոզված եմ, որ ջարդերի, վայրագությունների եւ մարդու կյանքի անվտանգությանը սպառնացող քրեահանցավոր գործելակերպի չդատապարտումը հանգեցնում է դրանց խրախուսմանը: Հիրավի, եթե «Սումգայիթյան ջարդերին» ժամանակին տրվեր համապատասխան գնահատական, ապա հայ բնակչության հանդեպ հետագայում վայրագություններ տեղի չէին ունենա Կիրովաբադում, Բաքվում, Մարաղայում եւ այլ քաղաքներում», - նշել է ՌԴ-ում ՀՀ դեսպանը:

Միջոցառմանը Հայ Առաքելական Եկեղեցու Ռուսաստանի եւ Նոր Նախիջեւանի հայոց թեմի հոգեւորականների կողմից մատուցվել է հոգեհանգստի արարողություն:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր