ՀՀ Սփյուռքի նախարարի այցը Մոսկվա

17 նոյեմբերի, 2013

Նոյեմբերի 15-17-ը ՀՀ Սփյուռքի նախարար Հրանուշ Հակոբյանը «Աշխատանք համայնքների հետ» ծրագրի շրջանակներում այցելել է Ռուսաստանի Դաշնության Մոսկվա, Կալուգա և Տուլա քաղաքներ եւ հանդիպումներ ունեցել տեղի համայնքների ներկայացուցիչների հետ: Հանդիպումները կազմակերպվել են ՌԴ-ում ՀՀ դեսպանության, Ռուսաստանի և Նոր Նախիջևանի Հայոց թեմի, Ռուսաստանի հայերի միության, Համաշխարհային հայկական կոնգրեսի և «Ռուս-հայկական համագործակցություն» հասարակական կազմակերպությունների աջակցությամբ:

Նոյեմբերի 15-ին ՀՀ սփյուռքի նախարարն այցելել է Ռուսաստանի Դաշնությունում Հայաստանի դեսպանություն, հանդիպում ունեցել դեսպան Օլեգ Եսայանի և դեսպանության դիվանագիտական անձնակազմի հետ: Հանդիպման ընթացքում քննարկվել են Հայաստան-Սփյուռք գործակցության զարգացման միտումներին, հետագա համագործակցության հեռանկարներին վերաբերող տարաբնույթ հարցեր:

Նույն օրը Մոսկվայի հայկական վանական համալիրի Սուրբ Պայծառակերպություն նորաբաց եկեղեցու հանդիսությունների սրահում ՀՀ Սփյուռքի նախարարը հանդիպել է համայնքի ղեկավարների և ավելի քան 500 ներկայացուցիչների հետ: Ողջունելով ներկաներին՝ նախարարը բարձր է գնահատել Սփյուռքի ամենահայաշատ համայնքներից մեկի՝ Մոսկվայի հայ համայնքի՝ հայապահպանությանն ուղղված աշխատանքն ու ներկայացրել է ՀՀ սփյուռքի նախարարության 5-ամյա գործունեության ընթացքում իրականացված ծրագրերն ու առաջիկա անելիքները: Հանդիպմանը ելույթով հանդես է եկել նաեւ ՌԴ-ում ՀՀ դեսպան Օլեգ Եսայանն, ով իր խոսքում ընդգծել է ՀՀ Սփյուռքի նախարարության բացառիկ նշանակությունն արտերկրում հայկական համայնքների միավորման, աշխատանքների համակարգման եւ հայապահպանության գործում:

ՀՀ Սփյուռքի նախարար Հ.Հակոբյանը պատասխանել է նաեւ ներկաների հարցերին եւ համայնքի ներկայացուցիչների հետ քննարկել երկուստեք հետաքրքրություն ներկայացնող մի շարք հարցեր:

Հանդիպման ավարտին Հայոց Ցեղասպանության 100-րդ տարելիցին նվիրված միջոցառումների շրջանակներում Հայաստանից ժամանած արվեստագետների խումբը ՀՀ վաստակավոր արտիստ Սարգիս Նաջարյանի գլխավորությամբ ներկայացրել է «Կոմիտաս՝ հավերժի ճամփորդ» բեմադրությունը:

Նույն ծրագրով ՀՀ Սփյուռքի նախարար Հրանուշ Հակոբյանը նոյեմբերի 16-ին մեկնել է Ռուսաստանի Կալուգա, իսկ նոյեմբերի 17-ին` Տուլա քաղաքներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր