Մոսկվայում կայացել է “Սև Գրքի” շնորհանդեսը

21 հուլիսի, 2014

Ս/թ. հուլիսի 19-ին Մոսկվայի Հայ Առաքելական Եկեղեցու վանական համալիրի հանդիսությունների դահլիճում ռուսաստանյան “XXI-րդ դարի իրավական տեխնոլոգիաներ” կազմակերպության նախաձեռնությամբ տեղի է ունեցել գրականագետ, հրատարակիչ Ալբերտ Իսոյանի “Սև Գիրքը. նշանավոր օտարազգիները թուրքական ոճրագործությունների և Հայոց Ցեղասպանության մասին” խորագրով ռուսալեզու ժողովածուի երկրորդ վերալրացված հրատարակության շնորհանդեսը:

Գրքի բացառիկ նշանակությունը պայմանավորված է ռուսալեզու ընթերցողի համար Հայոց Ցեղասպանության վերաբերյալ բազմաթիվ անհայտ փաստերի և իրադարձությունների ներկայացման կարևորությամբ, որոնք տեղ են գտել նշանավոր օտարազգիների գրառումներում, հրապարակումներում, պետական փաստաթղթերում և այլ կարգի փաստավավերագրական նյութերում:

Շնորհանդեսին ներկա ՌԴ-ում ՀՀ դեսպան Օլեգ Եսայանն իր երախտիքի խոսքն է հայտնել “XXI-րդ դարի իրավական տեխնոլոգիաներ” կազմակերպության ղեկավարությանը և գրքի հեղինակին նշյալ հրատարակության պատրաստման համար:

ՌԴ-ում ՀՀ դեսպանը նշել է նաև, որ “Սև Գիրք” ժողովածուն կազմել են բազմապիսի գործունեությամբ զբաղված, տարբեր մասնագիտությունների տեր անհատներ` գրողներ, պատմաբաններ, դիվանագետներ, ճանապարհորդներ, միսիոներներ, լրագրողներ, պետական և ռազմական գործիչներ: “Նրանցից շատերը եղել են այդ իրադարձությունների անմիջական վկաները: Եվ գրքի հրատարակումը Օսմանյան Թուրքիայում Հայոց Ցեղասպանության 100-րդ տարելիցին ընդառաջ ևս մեկ քայլ է, որն ապացուցում է Թուրքիայի կողմից իրականացված հրեշավոր ոճրագործությունների հաջորդականությունը կայսերության քրիստոնյա և ոչ մահմեդական հնազանդների հանդեպ, ինչպես նաև հիմնավորված կերպով դատապարտում թուրքական կայսերությանը` մարդկության պատմության մեջ առաջին ցեղասպանության նախապատրաստման, կազմակերպման և իրականացման մեջ”, - նշել է Օ.Եսայանը:

“XXI-րդ դարի իրավական տեխնոլոգիաներ” կազմակերպության նախագահ Յուրի Սկուրատովն անդրադարձել է գրքի համաշխարհային նշանակությանը` ընդգծելով, որ վերոնշյալ հրատարակությունը լույս է սփռում Օսմանյան կայսերության վարած քաղաքականության և հայ ժողովրդի հանդեպ ցեղասպանության իրականացման անհերքելի փաստերի վրա:

Գրքի հեղինակ-կազմող Ալբերտ Իսոյանը, միջոցառմանը հանդես գալով եզրափակիչ խոսքով, ընդգծել է, որ “Սև Գրքի” հրատարակման հիմնական նպատակն է` ներկայացնել Թուրքիայի կողմից մինչև օրս վարվող ժխտողական քաղաքականության ձախողումն ու անհեռանկար ուղին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր