Պաշտոնական ընդունելություն Մոսկվայում` ՀՀ Անկախության հռչակման 23-րդ տարեդարձի առթիվ

24 սեպտեմբերի, 2014

Ս/թ. սեպտեմբերի 23-ին Մոսկվայի “Ռենեսանս Մոնարխ” հյուրանոցային համալիրի շքասրահում տեղի է ունեցել Հայաստանի Հանրապետության Անկախության հռչակման օրվան նվիրված պաշտոնական ընդունելությունը: Հանդիսավոր ընդունելությանը մասնակցել են ՌԴ բարձրաստիճան պաշտոնյաներ, ՌԴ-ում հավատարմագրված օտարերկրյա պետությունների դեսպաններ, միջազգային կառույցների ղեկավարներ, քաղաքական, հասարակական և մշակույթի բնագավառի անվանի գործիչներ, ՀԱԵ Ռուսաստանի և Նոր Նախիջևանի հայոց թեմի առաջնորդ Տ.Եզրաս արքեպիսկոպոս Ներսիսյանը, տարածաշրջանային կառույցներում ՀՀ պաշտոնական ներկայացուցիչներն ու Մոսկվայի հայ համայնքի հայտնի գործիչներ:

Հանդիսավոր ընդունելությանը բացման խոսքով հանդես է եկել ՌԴ-ում ՀՀ դեսպան Օլեգ Եսայանը` նշելով, որ հայ ժողովրդի բազմաթիվ սերունդների համար Անկախության Հանրահռչակումը դարձավ դարավոր իղձերի իրականացման նոր պատմական փուլի սկիզբ. “Այս իրադարձությունը Հայաստանի նորագույն պատմության մեջ կանխորոշիչ դերակատարում է ունեցել. աշխարհասփյուռ հայության շրջանում այն նպաստել է ազգային գիտակցության բարձրացմանը և համազգային շահերի իրականացման նպատակով անկախ պետականության շուրջ շարունակական համախմբմանը”: Իր ելույթում դեսպան Օ.Եսայանն անդրադարձել է նաև հայ-ռուսական ռազմավարական դաշնակցային հարաբերությունների առանցքային ոլորտներին` նշելով, որ երկու ժողովուրդների բարեկամությունն այսօր շարունակում է ամրանալ միջպետական փոխգործակցության շրջանակների ընդլայնմամբ”:

ՀՀ Անկախության տոնի առթիվ շնորհավորական ելույթով հանդես է եկել նաև ՌԴ Արտաքին գործերի նախարարի տեղակալ, պետքարտուղար Գրիգորի Կարասինը, ով անդրադառնալով քաղաքական, տնտեսական, հասարակական և մշակույթի բնագավառներում երկու պետությունների փոխգործակցության լայն շրջանակին` վստահություն է հայտնել, որ հետագայում ևս հայ-ռուսական երկկողմ հարաբերությունները կշարունակվեն բարձր արդյունավետությամբ և համագործակցության խորացմանն ուղղված ինտեգրացիոն նոր ձևաչափերում:

Տոնական հանդիսությունը շարունակվել է ՀԱԵ Ռուսաստանի և Նոր Նախիջևանի հայոց թեմի հովանու ներքո գործող Հայորդաց տան “Հայասա” պարային համույթի համերգային կատարումներով: Հյուրանոցային համալիրի դահլիճում կազմակերպվել էր նաև ՌԴ վաստակավոր նկարիչ` հայազգի Յուրի Գրիգորյանի և որդու` Յուրի Գրիգորյան կրտսերի հայկական մոտիվներով գեղանկարների ցուցադրությունը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր