Դեսպան Վարդան Տողանյանն այցելել է Թաթարստանի Հանրապետություն

27 մայիսի, 2017

Ս/թ․ մայիսի 24-ին ՌԴ-ում ՀՀ դեսպան Վարդան Տողանյանը հանդիպել է ՌԴ Թաթարստանի Հանրապետության (ԹՀ) վարչապետ Ալեքսեյ Պեսոշինի հետ: Զրույցի ընթացքում կողմերը քննարկել են հայ-ռուսական հարաբերությունների շրջանակներում ՀՀ և ԹՀ համագործակցության հեռանկարների, ինչպես նաև փոխադարձ առևտրի շրջանակների և ծավալների ընդլայնման շուրջ մի շարք հարցեր:

Դեսպան Տողանյանը Թաթարստանի կառավարության ղեկավարին առաջարկել է քննարկել Կազանում Հայաստանի առևտրի տուն ստեղծելու հնարավորությունը, ինչպես նաև հայկական եկեղեցի կառուցելու և ԹՀ-ում ՀՀ Պատվո հյուպատոս նշանակելու վերաբերյալ հարցեր:

Հանդիպման ընթացքում կողմերը անդրադարձ են կատարել նաև հումանիտար համագործակցության հարցերին, մասնավորապես` կրթության, սպորտի, տուրիզմի, մշակույթի ոլորտներում:

Նույն օրը կայացել է ՌԴ-ում ՀՀ դեսպանի հանդիպումը ԹՀ փոխվարչապետ Վասիլ Շահրազիևի և ԹՀ ներդրումների զարգացման գործակալության ղեկավար Թալիա Մինուլլինայի հետ: Հանդիպումների ընթացքում քննարկվել է հարցերի լայն շրջանակ, մասնավորապես` համատեղ ներդրումային ծրագրերի իրականացման, ԵԱՏՄ շրջանակներում համագործակցության ընդլայնման, ինչպես նաև ԹՀ-ի արտադրությունը Հայաստանի տարածքով դեպի Իրան և Մերձավոր Արևելքի այլ երկրներ արտահանելու հնարավորությունների շուրջ:

Կազանում կայացել է նաև դեսպան Տողանյանի հանդիպումը ԹՀ մշակույթի նախարար Այրատ Սիբագատուլինի հետ: Զրույցի ընթացքում կողմերը քննարկել են համատեղ մշակութային միջոցառումների կազմակերպմանն առնչվող հարցեր, այդ թվում նաև՝ 2018 թ.-ին Հայաստանում Թաթարստանի և ԹՀ-ում Հայաստանի մշակույթների տարիներ անցկացնելու հնարավորության վերաբերյալ:

ԹՀ աշխատանքային այցի շրջանակներում դեսպան Տողանյանն այցելել է «Քիմգրադ» տեխնոպոլիսը, բարձրագույն տեխնոլոգիաների «Իննոպոլիս» քաղաքն ու Կազանի «IT park»-ը:

Կազանի Բարեկամության տանը դեսպան Տողանյանը հանդիպել է նաև ԹՀ հայ համայնքի ներկայացուցիչների հետ:

Ս/թ․մայիսի 26-ին դեսպան Տողանյանը ՀՀ վարչապետ Կ․Կարապետյանի գլխավորած պատվիրակության կազմում մասնակցել է ԱՊՀ կառավարությունների ղեկավարների խորհրդի և Եվրասիական միջկառավարական խորհրդի նիստերի աշխատանքներին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր