Մոսկվայում տեղի ունեցավ ՀՀ Անկախության 26-րդ տարեդարձին նվիրված ընդունելություն

26 սեպտեմբերի, 2017

Ս/թ. սեպտեմբերի 25-ին Մոսկվայի Ա․Ս․Պուշկինի պետական թանգարանի շքասրահում տեղի ունեցավ Հայաստանի Հանրապետության Անկախության հռչակման 26-ամյակին նվիրված հանդիսավոր ընդունելությունը։

Միջոցառման հյուրերի թվում էին՝ ՌԴ տրանսպորտի նախարար, հայ-ռուսական տնտեսական համագործակցության միջկառավարական հանձնաժողովի ռուսաստանյան կողմի համանախագահ Մաքսիմ Սոկոլովը, ՌԴ ԱԳ նախարարի տեղակալ, պետքարտուղար Գրիգորի Կարասինը, ԵՏՀ կոլեգիայի նախագահ Տիգրան Սարգսյանը, ՀԱՊԿ Գլխավոր քարտուղար Յուրի Խաչատուրովը, ՀԱԵ Ռուսաստանի և Նոր Նախիջևանի Հայոց թեմի առաջնորդ Եզրաս արքեպիսկոպոս Ներսիսյանը, ՌԴ Պետդումայի պատգամավորներ, ՌԴ-ում հավատարմագրված չորս տասնյակից ավելի օտարերկրյա պետությունների դեսպաններ, մշակույթի և գիտության բնագավառի ռուսաստանյան անվանի գործիչներ, ռուսաստանաբնակ հայազգի գործարարներ և Ռուսաստանի հայ համայնքի ներկայացուցիչներ:

Միջոցառմանը բացման խոսքով հանդես եկավ ՌԴ-ում ՀՀ դեսպան Վարդան Տողանյանը, ով իր խոսքում անդրադարձավ հայ-ռուսական հարաբերությունների ներկայիս բարձր մակարդակին՝ նշելով, որ ընթացող տարում նշվում է ՀՀ և ՌԴ միջև դիվանագիտական հարաբերությունների հաստատման 25-ամյակն ու ՀԱԵ Ռուսաստանի և Նոր Նախիջևանի թեմի ձևավորման 300-ամյակը: «Մենք վստահ կարող ենք հայտարարել, որ Ռուսաստանը մեր վաղեմի, վստահելի ռազմավարական գործընկերն է», - նշեց Վարդան Տողանյանը։

Տոնի առթիվ շնորհավորական ելույթով հանդես եկավ ՌԴ արտաքին գործերի նախարարի տեղակալ, պետքարտուղար Գրիգորի Կարասինը, ով իր խոսքոմ անդրադարձավ երկու երկրների միջև երկկողմ և բազմակողմ փոխգործակցությանը։ «Միացյալ ուժերով մեզ հաջողվեց առաջընթաց արձանագրել տարբեր բնագավառներում` տնտեսականից մինչև մշակույթ ու կրթություն: Ռուսաստանի և Հայաստանի միջև դաշնակցային հարաբերություններն այսօր, իսկապես, ունեն ընդգրկուն օրակարգ», - ընդգծեց ՌԴ ԱԳ նախարարի տեղակալը։

Ընդունելությունը շարունակվեց Հայաստանից Մոսկվա ժամանած «Գողթ» էթնո-ջազային խմբի կատարումներով։

Միջոցառման շրջանակներում թանգարանի շքասրահում բացվեց նաև «Փարաջանովի աշխարհները» խորագրով ինստալյացիան։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր