ՌԴ-ում ՀՀ դեսպանն առցանց դասախոսությամբ հանդես է եկել ԵՊՀ միջազգային հարաբերությունների ամառային դպրոցի մասնակիցների համար

17 հուլիսի, 2020

Ս/թ․ հուլիսի 17-ին ՌԴ-ում ՀՀ դեսպան Վարդան Տողանյանը տեսակապ-դասախոսություն է անցկացրել «Հայաստանի Հանրապետության հարաբերությունները համաշխարհային քաղաքականության խոշոր դերակատարների հետ» խորագրով ամառային դպրոցի մասնակիցների, ԵՊՀ միջազգային ֆակուլտետի մագիստրատուրայի ուսանողների հետ։

Դասախոսության շրջանակներում դեսպան Վ․Տողանյանն անդրադարձել է հայ-ռուսական հարաբերությունների արդի փուլին, ներկայացրել երկկողմ և բազմակողմ հարթություններում երկու երկրների միջև ռազմաքաղաքական, տնտեսական փոխգործակցությանն առնչվող հարցերն, ինչպես նաև խոսել դեսպանության կողմից իրականացվող աշխատանքների մասին։

Առանձին անդրադարձ է կատարվել վերջին օրերին հայ-ադրբեջանական սահմանի հյուսիսարևելյան հատվածում ադրբեջանական ագրեսիայի հետևանքով ստեղծված իրադրությանը և դրա շուրջ տարածաշրջանի երկրների արձագանքին։

ՌԴ-ում ՀՀ դեսպանը պատասխանել է նաև առցանց դասախոսության մասնակիցների հարցերին։

Դասախոսությանը մասնակցել են նաև ԵՊՀ միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանը, միջազգային հարաբերությունների ֆակուլտետի դեկան Գեղամ Պետրոսյանը և ֆակուլտետի դեկանի տեղակալ Ժակ Մանուկյանը։

Ամառային դպրոցը, որը մեկնարկել է ս/թ․ հուլիսի 15-ին, իրականացվում է ԵՊՀ միջազգային հարաբերությունների ֆակուլտետի և ՀՀ ԱԳՆ-ի միջև հաստատված համագործակցության շրջանակում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր