Դեսպանությունում կայացավ ընդունելություն՝ նվիրված Հաղթանակի 77-ամյակին

11 մայիսի, 2022

Ս/թ․ մայիսի 11-ին ՌԴ-ում ՀՀ դեսպանությունում տեղի ունեցավ հանդիսավոր ընդունելություն Հայրենական Մեծ պատերազմում նվաճած Հաղթանակի 77-ամյակի առթիվ։

Ընդունելությանը ներկա են գտնվել ՌԴ Պաշտպանության, Արտաքին գործերի նախարարությունների և ռուսաստանյան այլ գերատեսչությունների ներկայացուցիչները, ՌԴ-ում հավատարմագրված օտարերկրյա պետությունների դեսպաններն ու ռազմական կցորդները, պատերազմի վետերանները, հայազգի անվանի հրամանատարների և Հայրենական Մեծ պատերազմի մասնակիցների սերունդների ներկայացուցիչները։

Ընդունելությանը ողջույնի խոսքով հանդես է եկել ՌԴ-ում ՀՀ դեսպան Վաղարշակ Հարությունյանը, ով իր խոսքում ընդգծել է նոր սերունդների շրջանում Հայրենական Մեծ պատերազմի մասնակիցների կատարած սխրանքների հիշատակի պահպանման կարևորությունն, ինչպես նաև անդրադարձել է հայ ժողովրդի ներդրումին Հաղթանակի նվաճման գործում։ ՌԴ-ում ՀՀ դեսպանն առանձնահատուկ ընդգծել է նաև թիկունքի աշխատանքը պատերազմի օրերին։

Միջոցառմանը ելույթներով հանդես են եկել նաև ՌԴ-ում ՀՀ դեսպանությանը կից ռազմական կցորդ գեներալ-մայոր Արմեն Լալայանն ու ՌԴ Պաշտպանության նախարարության միջազգային ռազմական համագործակցության գլխավոր վարչության ղեկավարի տեղակալ գեներալ-մայոր Ալեքսեյ Լիպիլինը։

Ընդունելության շրջանակներում ՌԴ-ում ՀՀ դեսպան Վ․ Հարությունյանին հանձնվել է ՌԴ ՊՆ նախարարի հրամանագրով շնորհված նախարարության «Մարտական ընկերակցության համար» մեդալը։

Ընդունելությունը շարունակվել է դեսպանության Մշակույթի կենտրոնի կողմից կազմակերպված ծրագրով՝ նվիրված հայազգի խորհրդային ռազմական գործիչներին և պատերազմի մասնակիցներին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր