Մոսկվայում մեկնարկել են Ռուսաստանում Հայաստանի մշակույթի օրերը

10 հունիսի, 2022

Ս/թ․ հունիսի 10-ին Մոսկվայի Պ․Ի․ Չայկովսկու անվան համերգասրահում տեղի ունեցավ Ռուսաստանում Հայաստանի մշակույթի օրերի բացման հանդիսավոր արարողությունը։

«Ռուսաստանում Հայաստանի մշակույթի օրերը» նվիրված են ՀՀ և ՌԴ միջև դիվանագիտական հարաբերությունների հաստատման 30-ամյակին։ Կազմակերպիչներն են՝ ՀՀ կրթության, գիտության, մշակույթի և սպորտի նախարարությունը, ՌԴ մշակույթի նախարարությունը, «Ռոսկոնցերտ»-ը՝ ՌԴ-ում ՀՀ դեսպանության մասնակցությամբ։

Հանդիսավոր բացմանը ելույթներով հանդես եկան ՀՀ կրթության, գիտության, մշակույթի և սպորտի նախարարի տեղակալ Արայիկ Խզմալյանը, ՌԴ մշակույթի նախարարի տեղակալ, պետքարտուղար Ալլա Մանիլովան։

ՌԴ-ում ՀՀ դեսպան Վաղարշակ Հարությունյանի ողջույնի խոսքերը ներկաներին և մշակույթի օրերի մասնակիցներին փոխանցեց դեսպանության Մշակույթի կենտրոնի ղեկավար Վլադիմիր Գաբբեն։

Միջոցառմանը ներկաներն ունկնդրեցին Հայաստանի ազգային ֆիլհարմոնիկ նվագախմբի կատարումները՝ Էդուարդ Թոփչյանի ղեկավարությամբ։

ՀԱՖՆ-ը համերգի ընթացքում կատարեց հայ և ռուս ականավոր կոմպոզիտորների ստեղծագործությունները, որոնց թվում էին՝ Արամ Խաչատրյանի Սյուիտը ‹‹Սպարտակ›› բալետից, Առնո Բաբաջանյանի ‹‹Հերոսական բալլադը››՝ գրված դաշնամուրի և նվագախմբի համար, Չայկովսկու թիվ 6 ‹‹Պաթետիկական›› սիմֆոնիան:

Հանդիսատեսը ջերմորեն ողջունեց համերգի հատուկ հյուրերին՝ միջազգային փառատոնների դափնեկրեր Ալեքսանդր Գինդինին /դաշնամուր/ և Լիպարիտ Ավետիսյանին /տենոր/։

Նշենք, որ ս/թ․ հունիսի 11-ին Մոսկվայի պետական կոնսերվատորիայի Ռախմանինովի անվան սրահում տեղի կունենա Կոմիտասի անվան ազգային լարային քառյակի ելույթը /ղեկ․՝ Էդուարդ Թադևոսյան/։ Քառյակի երկրորդ համերգը կկայանա հունիսի 13-ին Կիսլովոդսկի Վ․ Ի․ Սաֆոնովի անվան Հյուսիսկովկասյան պետական ֆիլհարմոնիայում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր