Դեսպան Վ․Հարությունյանը ՌԴ Պետդումայի պատգամավոր Վ․Րեսինի հրավերով այցելել է ք․Մոսկվայի եկեղեցական համալիր

05 սեպտեմբերի, 2022

Սեպտեմբերի 3-ին ՌԴ-ում ՀՀ դեսպան Վաղարշակ Հարությունյանը ՌԴ Պետդումայի պատգամավոր Վլադիմիր Րեսինի հրավերով այցելել է Ռուս Ուղղափառ եկեղեցու Սբ․Մեծ նահատակ Դեմետրիոս Թեսաղոնիկեցու եկեղեցական համալիրը։

Վլադիմիր Րեսինը, ով հանդիսանում է նաև ք․ Մոսկվայի քաղաքապետի և Մոսկվայի և Համայն Ռուսիո պատրիարք Կիրիլ Առաջինի խորհրդականը, ներկայացրել է ՀՀ արտակարգ և լիազոր դեսպանին հատուկ ծրագրի շրջանակում կառուցված եկեղեցական համալիրը՝ տեղակայված Մոսկվայի Խորոշևո-Մնյովնիկի շրջանում։

Դիվ․ներկայացուցչության ղեկավարին դիմավորել են ք․Մոսկվայի Հյուսիս-արևմտյան վարչական շրջանի ղեկավար Ալեքսեյ Պաշկովը, Հյուսիս-արևմտյան շրջանի փոխանորդության առաջնորդ, Նարո-Ֆոմինսկի եպիսկոպոս Պարամոնը, եկեղեցու հովվապետ հայր Դմիտրին (Կրուտով), ինչպես նաև եկեղեցու ծխականներն ու ծխական դպրոցի սաները։

Ծանոթանալով եկեղեցական համալիրին և դպրոցին՝ դեսպան Վ․Հարությունյանն ընդգծել է իրականացվող ծրագրի բացառիկությունն, ինչպես նաև նշել ծխական դպրոցների կարևորությունը, որոնք ոչ միայն որակյալ կրթություն են ապահովում, այլ նաև գրավիչ դառնում երեխաների և պատանիների շրջանում։

Հանդիպման ավարտին ՌԴ-ում ՀՀ դեսպանն իր շնորհակալությունն է հայտնել Ռուս Ուղղափառ եկեղեցու հոգևորականներին և Վլադիմիր Րեսինին հրավերի և եկեղեցական համալիրն այցելելու հնարավորության համար։

Նշենք, որ եկեղեցական համալիրն այս տարվա մարտին օծվել է Մոսկվայի և Համայն Ռուսիո պատրիարք Կիրիլ Առաջինի կողմից։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր