Դեսպան Վ․ Հարությունյանը հանդիպել է ՄՄՀՊԻ-ի հայ ուսանողների հետ

16 դեկտեմբերի, 2022

Դեկտեմբերի 15-ին ՌԴ-ում ՀՀ դեսպանություն են այցելել ՌԴ ԱԳՆ Մոսկվայի Միջազգային հարաբերությունների պետական ինստիտուտի (МГИМО) հայազգի ուսանողները։

Դեսպանության շքասրահում ուսանողների հետ հանդիպել է ՌԴ-ում ՀՀ դեսպան Վաղարշակ Հարությունյանը։

Ողջունելով ապագա դիվանագետներին՝ դեսպան Վ․Հարությունյանն ընդգծել է հայազգի երիտասարդության և բուհական միությունների հետ ճանաչողական հանդիպումների անցկացման կարևորությունն՝ ուղղված Հայրենիքի հետ կապի ամրապնդմանն ու դիվ․հաստատության հետ համագործակցության խորացմանը։

Վաղարշակ Հարությունյանն իր ելույթում անդրադարձել է հայ-ռուսական հարաբերությունների արդի փուլին, խոսել դրանց զարգացման հեռանկարների մասին։ ՌԴ-ում ՀՀ դեսպանն առանձին անդրադարձ է կատարել տարածաշրջանում տիրող իրավիճակին առնչվող հարցերին և ներկայացրել դրանց վերաբերյալ ՀՀ դիրքորոշումն ու մոտեցումները։

Հանդիպմանը ՌԴ-ում ՀՀ դեսպանը պատասխանել է նաև ուսանողների բազմաթիվ հարցերին, որոնք վերաբերել են հայ-ռուսական հարաբերություններին, եվրասիական տարածքի ինտեգրացիոն գործընթացներում ՀՀ մասնակցությանը, երկու պետությունների միջև գիտակրթական ոլորտում համագործակցությանն ու այլ թեմաներին։ Ուսանողները հետաքրքրվել են նաև դեսպանության գործունեությամբ տարաբեր ոլորտներում։

Այցելության շրջանակում ուսանողների համար կազմակերպվել է նաև շրջայց Արևելյան լեզուների Լազարյան ինստիտուտի պատմական շենքի դահլիճներով։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր