ՌԴ-ում ՀՀ դեսպանի հանդիպումը ք․Սոչիի հայ համայնքի ներկայացուցիչների հետ

03 ապրիլի, 2023

Ապրիլի 2-ին ՌԴ-ում ՀՀ դեսպան Վաղարշակ Հարությունյանը հանդիպել է ք․Սոչիի հայ համայնքի ներկայացուցիչների հետ։ Հանդիպմանը մասնակցել են համայնքային կառույցների, գործարար շրջանակների և երիտասարդական կառույցների ներկայացուցիչները։

Ելույթ ունենալով հանդիպմանը՝ դեսպան Վ․Հարությունյանը նշել է Հայրենիքի հետ համայնքի կապի ամրապնդման ու դեսպանության հետ համագործակցության ընդլայնման կարևորությունը, ընդգծել հայ-ռուսական հարաբերությունների բարձր մակարդակը, անդրադարձել երկու պետությունների միջև փոխգործակցության հիմնական ուղղություներին, ինչպես նաև խոսել տարածաշրջանային կայունության և անվտանգության պահպանման գործում Ռուսաստանի Դաշնության առանցքային դերի մասին։

Անդրադարձ է կատարվել նաև հայ-ռուսական միջտարածաշրջանային համագործակցության շրջանակում համայնքի մասնակցության հարցերին, ինչպես նաև ՀՀ-ում ստեղծված տնտեսական և ներդրումային հնարավորություններին։

Հանդիպմանը դեսպան Վ․Հարությունյանը պատասխանել է ներկաների բազմաթիվ հարցերին, որոնք վերաբերել են հայ-ռուսական հարաբերություններին, տարածաշրջանում ստեղծված իրավիճակին, տնտեսական ոլորտում ՀՀ կառավարության ծրագրերին և այլ թեմաներին։

ՌԴ-ում ՀՀ դեսպանը ք․Սոչիում այցելել է նաև «Սուրբ Սարգիս» Հայ Առաքելական եկեղեցի և հանդիպել եկեղեցու վանահայր Տեր Եզնիկ Ղազարյանի հետ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր