Դեսպան Վ.Հարությունյանի հանդիպումը Եկատերինբուրգի քաղաքապետ Ա.Օրլովի հետ

12 մայիսի, 2023

Մայիսի 12-ին՝ Սվերդլովսկի մարզ կատարած այցի շրջանակներում Ռուսաստանի Դաշնությունում Հայաստանի Հանրապետության դեսպան Վաղարշակ Հարությունյանը հանդիպում է ունեցել Եկատերինբուրգի քաղաքապետ Ալեքսեյ Օրլովի հետ։

ՀՀ դեսպանը՝ ի դեմս Ա.Օրլովի, շնորհակալություն է հայտնել Եկատերինբուրգի քաղաքապետարանին՝ «Հայաստանի օրերը Սվերդլովսկի մարզում» նախագիծն անցկացնելու հարցում աջակցություն ցուցաբերելու համար՝ նշելով, որ նախագիծը նոր լիցք կհաղորդի երկու երկրների միջև հումանիտար և մշակութային կապերի զարգացմանը։ Վ.Հարությունյանը հավելել է, որ Սվերդլովսկի մարզն առանձնահատուկ տեղ է զբաղեցնում Ռուսաստանի այն 70 տարածաշրջանների շարքում, որոնց հետ պայմանագրեր են կնքված գիտատեխնիկական, առևտրատնտեսական և մշակութային ոլորտներում, և նշել երկու երկրների միջև ստորագրված՝ 2022-2027թթ. միջտարածաշրջանային համագործակցության ծրագրի իրականացման գործողությունների ծրագրի շրջանակներում հետագա փոխգործակցության կարևորությունը։ Դեսպանը նաև վստահություն է հայտնել, որ 2023 թվականին ստորագրված՝ Երևանի քաղաքապետարանի և Եկատերինբուրգի վարչակազմի միջև համագործակցություն հաստատելու մասին մտադրությունների հուշագիրն էական ներդրում կունենա սոցիալ-տնտեսական հարաբերությունների զարգացման գործում, թույլ կտա զարգացնել միջքաղաքային մշակութային և գիտական կապերը, ինչպես նաև ակտիվացնել համագործակցությունը զբոսաշրջության ոլորտում։

Իր հերթին Ա.Օրլովը նշել է, որ Եկատերինբուրգը Ռուսաստանի բազմազգ քաղաքներից մեկն է, և տեղում բնակվող հայ համայնքն ամբողջությամբ ինտեգրված է քաղաքի կենսագործունեության տարբեր ոլորտներում։

Ա.Օրլովը բարձր է գնահատել Սվերդլովսկի մարզում Հայաստանի Հանրապետության պատվավոր հյուպատոսի գործունեությունը՝ տարածաշրջանի և Հայաստանի միջև բազմակողմ համագործակցության ամրապնդման գործում։

Քաղաքապետն անդրադարձել է նաև Եկատերինբուրգի պատվիրակության և տարածաշրջանի գրեթե երկու տասնյակ առաջատար ձեռնարկությունների ղեկավարների՝ վերջերս Երևան կատարած այցին և վստահություն հայտնել, որ այն կնպաստի Ուրալյան տարածաշրջանի և Հայաստանի միջև գործարար կապերի ամրապնդմանն ու թույլ կտա զարգացնել փոխշահավետ համագործակցության նոր ուղղություններ։

Հանդիպմանը մասնակցել է Սվերդլովսկի մարզում Հայաստանի Հանրապետության պատվավոր հյուպատոս Նարեկ Սպարտակյանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր