Դեսպան Վ.Հարությունյանի հանդիպումը Պերմի երկրամասի նահանգապետ Դ.Մախոնինի հետ

15 մայիսի, 2023

Մայիսի 15-ին Ռուսաստանի Դաշնությունում Հայաստանի Հանրապետության դեսպանության պատվիրակությունը՝ դեսպան Վաղարշակ Հարությունյանի գլխավորությամբ աշխատանքային այցով մեկնել է Պերմի երկրամաս, որի շրջանակներում հանդիպում է ունեցել երկրամասի նահանգապետ Դմիտրի Մախոնինի հետ։

Հանդիպման ընթացքում քննարկվել են Հայաստանի և Պերմի երկրամասի միջև համագործակցության ակտիվացմանը, տարբեր ոլորտներում համագործակցության մասին հիմնարար համաձայնագրի, ինչպես նաև Հայաստանի քաղաքներից մեկի և Պերմ քաղաքի միջև քույրացման մասին պայմանագրի ստորագրման հնարավորությանը վերաբերող հարցեր։ Վ.Հարությունյանը նշել է Պերմի երկրամասի զգալի ներուժը՝ երկու երկրների կառավարությունների միջև ստորագրված՝ 2022-2027թթ.. միջտարածաշրջանային համագործակցության ծրագրի իրականացման գործողությունների ծրագրի շրջանակներում փոխշահավետ համագործակցության իրականացման գործընթացում։

Քննարկվել են նաև Հայ-ռուսական միջխորհրդարանական հանձնաժողովի շրջանակներում համագործակցության հեռանկարները՝ Հայաստանում ռուսաց լեզվի և Ռուսաստանում հայոց լեզվի դասավանդման մասով։ Դ.Մախոնինը պատրաստակամություն է հայտնել համակողմանի աջակցություն ցուցաբերել՝ Պերմի երկրամասում հայոց լեզվի ուսուցման կազմակերպման հարցում։

Հանդիպման ընթացքում դեսպանը նշել է հայ համայնքի կարևոր կապող դերը՝ երկկողմ համագործակցության հետագա ամրապնդման գործում։

Նահանգապետ Դ.Մախոնինն, իր հերթին, ներկայացրել է Պերմի երկրամասի արդյունաբերական և գիտակրթական ներուժը՝ նշելով, որ տեղի հայ համայնքը ներգրավված է երկրամասի կենսագործունեության բոլոր ոլորտներում և նշանակալի ներդրում ունի տարածաշրջանի զարգացման գործում։

Հանդիպմանը մասնակցել է Սվերդլովսկի մարզում Հայաստանի Հանրապետության պատվավոր հյուպատոս Նարեկ Սպարտակյանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր