Հայաստանի Հանրապետության պատվիրակության հանդիպումը Տյումենի մարզի նահանգապետի և Տյումենի քաղաքապետի հետ

20 հունիսի, 2023

Հունիսի 18-ին ՀՀ փոխվարչապետ Մհեր Գրիգորյանի գլխավորած պատվիրակության՝ Տյումենի մարզ կատարած այցի շրջանակներում պատվիրակության անդամները հանդիպում են ունեցել մարզի նահանգապետ Ալեքսանդր Մոորի և Տյումենի քաղաքապետ Ռուսլան Կուխարուկի հետ։ Հայկական կողմից հանդիպմանը մասնակցել են ՀՀ տարածքային կառավարման և ենթակառուցվածքների նախարար Գնել Սանոսյանը, վարչապետի աշխատակազմի ղեկավար Արայիկ Հարությունյանը, էկոնոմիկայի նախարարի տեղակալ Նարեկ Տերյանը, Գեղարքունիքի մարզպետ Կարեն Սարգսյանը, սփյուռքի գործերի գլխավոր հանձնակատար Զարեհ Սինանյանը, ՌԴ-ում ՀՀ դեսպան Վաղարշակ Հարությունյանը և Տյումենում ՀՀ պատվավոր հյուպատոս Աբրահամ Հովեյանը։

Հանդիպման ընթացքում քննարկվել է ՀՀ և Տյումենի մարզի միջև տարբեր ոլորտներում համագործակցությանը վերաբերող հարցերի լայն շրջանակ։ Առանձնահատուկ ուշադրություն է դարձվել առևտրատնտեսական հարաբերությունների զարգացմանն ու ընդլայնմանը, միջտարածաշրջանային համագործակցությանը, ինչպես նաև գիտության, կրթության, մշակույթի, բիզնեսի և փոխադարձ ներդրումների ոլորտներում փոխգործակցությանը։ Կողմերը երկուստեք ընդգծել են իրենց հետաքրքրվածությունը՝ գործարար շրջանակների միջև ուղիղ շփումներ հաստատելու հարցում։ Կողմերը կարևորել են նաև երկկողմ իրավապայմանագրային դաշտի ընդլայնման անհրաժեշտությունը, ինչպես նաև հաստատել՝ Հայաստանի Հանրապետության և Տյումենի մարզի միջև առևտրատնտեսական, գիտատեխնիկական, մշակութային և սոցիալական ոլորտներում համագործակցության վերաբերյալ հիմնարար համաձայնագրի ստորագրման շուրջ փոխադարձ հետաքրքրվածությունը, ինչը թույլ կտա համագործակցությունը նոր մակարդակի վրա բարձրացնել։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր