Դեսպան Վ.Հարությունյանը հանդիպում է ունեցել Ռուսաստանում Հնդկաստանի դեսպան Պ.Կապուրի հետ

07 օգոստոսի, 2023

Օգոստոսի 4-ին Ռուսաստանի Դաշնությունում Հայաստանի Հանրապետության դեսպան Վաղարշակ Հարությունյանը հանդիպում է ունեցել Ռուսաստանի Դաշնությունում Հնդկաստանի դեսպան Պավան Կապուրի հետ։

Հանդիպման ընթացքում քննարկվել են Հայաստանի և Հնդկաստանի միջև տարբեր ոլորտներում երկկողմ համագործակցությանն առնչվող հարցեր, ինչպես նաև երկրների միջև հարաբերությունների հետագա խորացման հեռանկարները։

Դեսպան Վ.Հարությունյանը գործընկերոջը մանրամասն ներկայացրել է Լեռնային Ղարաբաղի ժողովրդի դեմ Ադրբեջանի լայնածավալ ագրեսիայի, ինչպես նաև 2021 թվականի մայիսին և 2022 թվականի սեպտեմբերին Հայաստանի Հանրապետության ինքնիշխան տարածքի նկատմամբ ադրբեջանական ագրեսիայի արդյունքում տարածաշրջանում ստեղծված իրավիճակը։

Վ.Հարությունյանն ընդգծել է, որ Լաչինի միջանցքի շրջափակման հետ կապված իրավիճակը հատել է Լեռնային Ղարաբաղում հումանիտար աղետի սահմանը՝ ըստ էության բացահայտելով խաղաղ բնակչությանը փաստացի պաշարում հայտարարած Ադրբեջանի ցեղասպան քաղաքականությունը։ Նա զրուցակցի ուշադրությունն է հրավիրել բնակչության՝ սննդամթերքի, կենսական անհրաժեշտության ապրանքների և դեղորայքի հասանելիության բացակայության փաստի վրա։ Այս համատեքստում Դեսպանը նշել է Լաչինի միջանցքի հնարավորինս արագ ապաշրջափակման անհրաժեշտությունը։

Տեղի է ունեցել նաև մտքերի լայն փոխանակություն՝ փոխադարձ հետաքրքրություն ներկայացնող հարցերի շուրջ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր