Դեսպան Վ.Հարությունյանը Մոսկվայում մասնակցել է Յարոսլավլի մարզի տնտեսական և ներդրումային ներուժի շնորհանդեսին

18 սեպտեմբերի, 2023

Սեպտեմբերի 15-ին Ռուսաստանի Դաշնությունում Հայաստանի Հանրապետության դեսպան Վաղարշակ Հարությունյանը ՌԴ կառավարությանն առընթեր Յարոսլավլի մարզի կառավարության ներկայացուցչությունում մասնակցել է հայ գործարար շրջանակների ներկայացուցիչների և ձեռներեցների համար կազմակերպված՝ Յարոսլավլի մարզի տնտեսական և ներդրումային ներուժի շնորհանդեսին: Միջոցառմանը մասնակցել է Յարոսլավլի մարզի նահանգապետ Միխայիլ Եվրաևը:

Իր խոսքում դեսպան Վ.Հարությունյանը կարևորել է նման միջոցառումների անցկացումը՝ ընդգծելով կողմերի ներդրումային և տնտեսական մեծ հնարավորությունները, ինչպես նաև հայկական կողմի պատրաստակամությունը՝ Յարոսլավլի մարզի հետ համագործակցությունն ընդլայնելու հարցում:

Իր կողմից Յարոսլավլի մարզի նահանգապետ Մ.Եվրաևն ընդգծել է Հայաստանի Հանրապետության հետ տնտեսական համագործակցության ընդլայնման, ներդրողների ներգրավման, ինչպես նաև երկու երկրների գործարար շրջանակների միջև փոխշահավետ ուղիղ կապերի հաստատման հարցում շահագրգռվածությունը: Որպես համագործակցության հեռանկարային ոլորտներ՝ նշվել են զբոսաշրջությունն ու ագրոարդյունաբերական համալիրը։

Յարոսլավլի մարզում Հայաստանի Հանրապետության պատվավոր հյուպատոս Վահագն Խաչատրյանի աջակցությամբ կազմակերպված հանդիպման մասնակիցներին ներկայացվել է Յարոսլավլի մարզի ներդրումային և տնտեսական ներուժի շնորհանդեսը: Առևտրատնտեսական համագործակցության ընդլայնմանն առնչվող առաջարկություններով հանդես են եկել ավելի քան 20 հայկական և Յարոսլավլի ձեռնարկությունների ներկայացուցիչներ:

Միջոցառմանը մասնակցել են «Կիլիկիա» հայկական բիզնես ակումբի անդամներն ու Հայ ձեռներեցների ասոցիացիայի ներկայացուցիչները: Հանդիպման ավարտին Յարոսլավլի մարզի առևտրաարդյունաբերական պալատի և «Կիլիկիա» հայկական բիզնես ակումբի միջև ստորագրվել է համագործակցության հուշագիր:

Հանդիպման արդյունքում ձեռք են բերվել կոնկրետ պայմանավորվածություններ՝ հետագա համագործակցությանն, ինչպես նաև կողմերի միջև փոխգործակցության ընդլայնմանն ուղղված քայլերի հետևողական իրականացման շուրջ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր