ՀՀ Անկախության օրվան նվիրված հանդիսավոր ընդունելություն

22 հոկտեմբերի, 2025

Հոկտեմբերի 14-ին Մոսկվայում տեղի ունեցավ ՀՀ Անկախության օրվան նվիրված հանդիսավոր ընդունելություն։

Ռուսաստանի Դաշնությունում Հայաստանի Հանրապետության դեսպան Գուրգեն Արսենյանն իր ելույթում շնորհավորեց ներկաներին Հանրապետության պետական տոնի կապակցությամբ՝ նշելով.

«34 տարի շարունակ Հայաստանի վրա ծածանվում է Պետական դրոշը՝ լցնելով մեր սրտերը հպարտությամբ և խիզախությամբ։ Մենք կառուցում ենք մեր պետականությունն ու ժողովրդավարությունը՝ լիովին գիտակցելով, որ սա ամենաարժեքավորն է, որ կարող ենք փոխանցել հետագա սերունդներին՝ մեր մշակույթի, լեզվի, հազարամյա ավանդույթների, գրերի, այբուբենի և բազմամյա պատմության հետ միասին»։

Անդրադառնալով երկկողմ հարաբերություններին՝ դեսպան Արսենյանն ընդգծեց, որ երկրների միջև դիվանագիտական հարաբերությունները հաստատվել են 33 տարի առաջ, և այդ օրվանից դրանք կառուցվում են փոխադարձ հարգանքի, վստահության և կառուցողական փոխգործակցության հիմքի վրա, ինչը նպաստում է բազմակողմանի համագործակցության զարգացմանը՝ փոխադարձ հետաքրքրություն ներկայացնող բոլոր ոլորտներում։

Միջոցառմանը ելույթ ունեցան նաև ՌԴ Դաշնության խորհրդի փոխնախագահ Յուրի Վորոբյովը և արտաքին գործերի նախարարի տեղակալ Միխայիլ Գալուզինը։

Իր ելույթում Դաշնության խորհրդի փոխնախագահն ընդգծեց, որ Ռուսաստանը ոչ միայն խոսքով, այլև գործով ապացուցում է, որ Հայաստանի հուսալի գործընկերն է՝ ինչպես երկկողմ ձևաչափում, այնպես էլ եվրասիական ինտեգրման շրջանակներում։ «Ռուսաստանը շարունակում է մնալ Հայաստանի ներդրումային և առևտրատնտեսական առաջատար գործընկերներից մեկը։ Հայաստանի տնտեսության մեջ ռուսաստանյան ներդրումների ընդհանուր ծավալը գերազանցում է 4 մլրդ դոլար ցուցանիշը», - հավելեց Վորոբյովը։

Միանալով ՀՀ Անկախության օրվա առթիվ հնչեցված շնորհավորանքներին՝ ՌԴ արտաքին գործերի նախարարի տեղակալ Գալուզինը նշեց Հայաստանի ջանքերը պետականաշինության, պաշտպանունակության և սոցիալ-տնտեսական ներուժի ամրապնդման գործում և պատրաստակամություն հայտնեց հետագայում ևս նպաստել տարբեր ոլորտներում համագործակցության խորացմանն ու որակի բարձրացմանը։

Ընդունելությանը ներկա պատվավոր հյուրերի թվում էին նաև հայ և ռուս ականավոր մշակութային և գիտական գործիչներ, ձեռնարկատերեր։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր